O Whistle, And I'll Come To Ye, My Lad

Chorus
O Whistle, and I'll come to ye, my lad,
O whistle, an' I'll come to ye, my lad;
Tho' father, and mother and a' should gae mad,
Thy Jeanie will venture wi' ye, my lad.

But warily tent when ye come to court me,
And come nae unless the back-yett be a-jee;
Syne up the back-stile and let naebody see,
And come as ye were na comin' to me,
And come as ye were na comin' to me.

Chorus

At kirk, or at market, whene'er ye meet me,
Gang by me as tho' that ye car'd nae a flie;
But steal me a blink o' your bonie black e'e,
Yet look as ye were na lookin' to me,
Yet look as ye were na lookin' to me.

Chorus

Aye vow and protest that ye care na for me,
And whyles ye may lightly my beauty a wee;
But court nae anither, tho' jokin' ye be,
For fear that she wyle your fancy frae me,
For fear that she wyle your fancy frae me.

Chorus