My Harry Was A Gallant Gay

My Harry was a gallant gay,
Fu' stately strade he on the plain;
But now he's banish far awa,
I'll never see him back again.

O for him back again,
O for him back again,
I wad gie a' Knockhaspie's land
For Highland Harry back again.

When a' the lave gae to their bed,
I wander dowie up the glen;
I set me down and greet my fill,
And ay I wish him back again,

O for him back again,
O for him back again,
I wad gie a' Knockhaspie's land
For Highland Harry back again.

O were some villains hangit high,
And ilka body had their ain!
Then I might see the joyfu' sight,
My Highlan Harry back again.

O for him back again,
O for him back again,
I wad gie a' Knockhaspie's land
For Highland Harry back again.