Gudeen To You Kimmer

Gudeen to you kimmer
And how do ye do?
Hiccup, quo' kimmer,
The better that I'm fou.

Chorus
We're a' noddin, nid nid noddin,
We'r a' nodding at our house at hame,
We're a' noddin, nid nid noddin,
We're a' noddin at our house at hame.

Kate sits i' the neuk,
Suppin hen-broo;
Deil tak Kate
An' she be na noddin too!

Chorus

How's a' wi' you, kimmer,
And how do ye fare?
A pint o' the best o't,
And twa pints mair.

Chorus

How's a' wi' you, kimmer,
And how do ye thrive;
How mony bairns hae ye?
Quo' kimmer, I hae five.

Chorus

Are they a' Johny's?
Eh! Atweel no:
Twa o' them were gotten
When Johny was awa.

Chorus

Cats like milk
And dogs like broo;
Lads like lasses weel,
And lasses lads too.

Chorus