As I Was A Wand'ring

As I was a wand'ring ae midsummer e'enin,
The pipers and youngsters were makin their game,
Amang them I spyed my faithless fause luver,
Which bled a' the wounds o' my dolour again.

Weel, since he has left me, may pleasure gae wi' him;
I may be distress'd, but I winna complain:
I flatter my fancy I may get anither,
My heart it shall never be broken for ane.

I could na get sleeping till dawin, for greetin;
The tears trickl'd down like the hail and the rain:
Had I na got greetin', my heart wad a broken,
For Oh, luve forsaken's a tormenting pain!

Weel, since he has left me, may pleasure gae wi' him;
I may be distress'd, but I winna complain:
I flatter my fancy I may get anither,
My heart it shall never be broken for ane.

Although he has left me for greed o' the siller,
I dinna envy him the gains he can win:
I rather wad bear a' the lade o' my sorrow,
Than ever hae acted sae faithless to him.

Weel, since he has left me, may pleasure gae wi' him;
I may be distress'd, but I winna complain:
I flatter my fancy I may get anither,
My heart it shall never be broken for ane.